នៅថ្ងៃទី៣០ ខែធ្នូ ឆ្នាំ២០២០ មិត្តអ្នកដើរព្រៃនិងឡើងភ្នំចំនួន២៧ នាក់ និងសហគមន៍ចំនួន៦ នាក់ (អ្នកនាំផ្លូវ) បានធ្វើដំណើរចេញពីភូមិសូរិយា ឃុំតាសាល ស្រុកឱរ៉ាល់ ដោយចំណាយពេលវេលាប្រមាណ៦ម៉ោង ទាំងការធ្វើដំណើរដោយគោយន្ត និងថ្មើរជើង។ នៅក្នុងពេលធ្វើដំណើរទៅខ្នងវាល ក្រុមមិត្តអ្នកដើរព្រៃបានចូលលេងទឹកធ្លាកមួយដែលអ្នកភូមិហៅថាទឹកធ្លាក់“ដាតូច”។ បន្ទាប់មក យើងក៏បានបន្តដំណើរទៅគេងនៅលើខ្នងភ្នំនិងវាលស្រល់នៅតំបន់ខ្នងវាលជាមួយនឹងអាកាសធាតុដ៏ត្រជាក់ ក្រោមពន្លឺព្រះច័ន្ទជះពីលើចុងស្រល់គួរអោយចង់គយគន់នៅពេលរាត្រី។
នៅព្រឹកថ្ងៃទី៣១ ធ្នូ ២០២០ មិត្តអ្នកដើរព្រៃបានក្រោកពីព្រលឹមដើម្បីស្រស់ស្រូបអាហារពេលព្រឹក ញាំតែ និងកាហ្វេ ដោយអមជាមួយនិងការគយគនថ្ងៃរះពីលើខ្នងភ្នំ។ បន្ទាប់មកក្រុមមិត្តអ្នកដើរព្រៃបានរួសរាន់ចាកចេញពីខ្នងវាលពីព្រឹកព្រលឹមឆ្ពោះទៅកាន់តំបន់ខ្នងផ្សារ។ ប៉ុន្តែយើងមិនអាចដើរដល់តំបន់ខ្នងផ្សារទេ ដោយសារតែផ្លូវដែលត្រូវដើរមានចំងាយប្រមាណ២២ គីឡូម៉ែត្រ។ នៅក្នុងថ្ងៃទី២ នេះ គឺជាថ្ងៃពិសេសណាស់ ក្រៅពីរាត្រីឆ្លងឆ្នាំ នៅក្នុងដំណើរពីខ្នងវាលទៅខ្នងផ្សារ ក្រុមមិត្តអ្នកដើរព្រៃបានធ្វើដំណើរឆ្លងកាត់ជួរភ្នំដែលមានទេសភាពធម្មជាតិដ៏ស្រស់ស្អាតដែលអ្នកភូមិហៅថា “ព្រះគន្លង”។ ដំណើរឆ្លងកាត់ព្រះគន្លងដ៏វែងឆ្ងាយនេះ យើងបានដើរឆ្លងកាត់វាលស្រល់ ព្រៃស្រោង និងដើរឡើងចុះចំណោតច្រាំងភ្នំជាច្រើនកន្លែង។ រវល់តែឆ្លក់វង្វេងជាមួយនិងសម្រស់ធម្មជាតិ ពន្លឺនៃព្រះសូរិយាក៏បានទន់ទាបរាបលិច។ ក្រុមអ្នកដើរព្រៃក៏បានឈប់សម្រាកនៅតំបន់ច្រាំងកន្ទួត និងបានរៀបចំអាហារពេលល្ងាចដ៏ឆ្ងុយឆ្ងាញ់។ ក្រោយពីស្រស់ស្រូបអាហារល្ងាចរួច មិត្តអ្នកដើរព្រៃក៏បានអង្គុយជុំវិញភ្នក់ភ្លើងក្រោយដើមស្រល់ និងចែករំលែកបទពិសោធន៍គ្នាពីនេះពីនោះ និងជជែកគ្នាលេងក្រោមបរិយាកាសរីករាយដើម្បីត្រៀមខ្លួនឆ្លងឆ្នាំថ្មី។
ព្រឹកថ្ងៃទី១ ខែមករា ឆ្នាំ២០២១ ដែលជាថ្ងៃថ្មីនៃឆ្នាំថ្មី ក្រុមមិត្តអ្នកដើរព្រៃ បានធ្វើដំណើរចេញពីតំបន់ច្រាំងកន្ទួតនៃភ្នំហប ឆ្ពោះទៅកាន់ខ្នងកាំភ្លើងធំ ខ្នងសំពៅ និងខ្នងផ្សារ។ នៅក្នុងដំណើរនេះ យើងបានឆ្លងកាត់តំបន់ទឹកធ្លាក់ក្បាលស្តេចសាន្ត និងបានដើរលើជ្រលង និងចង្កេះភ្នំដែលមានព្រៃស្រោង និងដើមឈើធំៗក្រាស់ក្មឹក អមជាមួយនឹងសំឡេងសត្វទោចយំ និងសត្វក្រវាងហើរលើចុងឈើទ្រហឹងអ៊ឺងកង។ ម៉ោងប្រមាណ១ រសៀល ក្រុមមិត្តអ្នកដើរព្រៃក៏បានទៅដល់ជើងចំណោតខ្នងកាំភ្លើងធំ។ ក្រោយពីសម្រាកអាហារថ្ងៃត្រង់រួច យើងក៏បានឡើងចំណោតខ្នងកាំភ្លើងធំ។ ចំណោតខ្នងកាំភ្លើងធំនេះ បើដើរឡើងពីខ្នងវាលមានសភាពចោទខ្លាំងណាស់។ យើងមិនអាចឡើងត្រង់កើតទេ ប៉ុន្តែយើងបានដើរសសៀរៗតាមដានជើងរបស់សត្វខ្ទីងដែលធ្លាប់ឡើងស៊ីស្មៅលើខ្នងភ្នំ។ បន្ទាប់ពីឡើងលើខ្នងកាំភ្នើងធំរួច មិត្តអ្នកឡើងភ្នំមួយចំនួនបាននៅសម្រាកមើលទេសភាព និងថ្ងៃលិចដែលយើងអាចមើលជ្រលងភ្នំ និងទេសភាពបាន១៨០ ដឺក្រេ ក្រោមអាកាសធាតុត្រជាក់មនោរម្យ។ ក្រោយសូរិយាអស់ស្តង់គត បាំងជ្រលងភ្នំបាត់ទៅ យើងក៏បានបន្តដំណើរទៅសម្រាកតំបន់ខ្នងផ្សារ។
ព្រឹកថ្ងៃទី២ ខែមករា ឆ្នាំ២០២១ ក្រុមមិត្តអ្នកដើរព្រៃក៏បានបន្តដំណើរពីខ្នងផ្សារឆ្ពោះទៅកាន់តំបន់ខ្នងក្រពើ។ នៅថ្ងៃទី៤ នេះ ក្រុមមិត្តអ្នកដើរព្រៃមានសភាពអស់កំលាំង ថាមពលបានថយចុះស្ទើរគ្រប់គ្នាៗ អ្នកខ្លះចាប់ផ្តើមបែកកង់ រីឯខ្លះទៀតរលុងបដាង (ពាក្យលេងសើច)។ តែក្រុមមិត្តយើងមានការសហការនិងសាមគ្គីគ្នាល្អណាស់ដោយទឹកចិត្តនិងក្តីស្រឡាញ់។ ទីបំផុត យើងបានធ្វើដំណើរដល់គោលដៅទាំងអស់គ្នា គឺតំបន់ខ្នងក្រពើ ដែលជារាត្រីចុងក្រោយនៅលើខ្នងភ្នំរបស់យើងទាំងអស់គ្នា។ នៅក្នុងរាត្រីចុងក្រោយនេះយើងបានសម្រាកនៅ CI Camp Site ដែលស្ថិតនៅក្នុងឃុំប្រឡាយ ស្រុកថ្មបាំង ខេត្តកោះកុង និងបានអង្គុយជុំគ្នាជុំវិញភ្លក់ភ្លើងក្រោមអាកាសធាតុត្រជាក់ស្រៀវឆ្អឹងខ្នង។ អង្គុយក្រោមផ្ទៃមេឃដែលមានបណ្តុំផ្កាយដ៏ស្រស់ស្អាត យើងក៏បានធ្វើការឆ្លុះបញ្ចាំងនិងរំលឹកពីអនុស្សាវរីយ៍របស់យើងដែលបានឆ្លងកាត់ក្នុងរយៈពេល ៤ ថ្ងៃជាមួយគ្នា។ ខ្ញុំនៅចាំមិនភ្លេចគឺរឿបបក្សសត្វកាដេវ៉ិច និងបក្សបងប្អូនធម៌ (បក្សបងប្អូនធម៌សំបូរសាច់ណាស់) វាជាសំណើចស៊ើចចុកពោះ។
ថ្ងៃទី០៣ ខែមករា ឆ្នាំ២០២១ គឺជាថ្ងៃចុងក្រោយនៃការផ្សងព្រេងរបស់យើងទាំងអស់។ រយៈពេល៤ ថ្ងៃជាមួយគ្នាបានកន្លងផុតទៅមួយពព្រិចភ្នែកអញ្ចឹង។ ព្រឹកចុងក្រោយនេះ ក្រុមយើងដាច់ស្បៀង អង្ករក៏ជិតអស់ ប៉ុន្តែយើងសល់សាច់ក្រៀមខ្លះៗ។ យើងមិនអាចដាំបាយបានទេ យើងក៏សម្រេចដាំបបសនិងញាំជាមួយសាច់ក្រៀម និងត្រីខ។ ម្នាក់ៗអស់កាហ្វេ អស់មី ហាក់ស្ថិតនៅក្នុងសេចក្តីស្រេចឃ្លាន។ មានមិត្តម្នាក់ៗពីរម្នាក់ក្នុងក្រុមក៏បានធ្វើការប្រកូកប្រកាសឱ្យចេញស្បៀងឱ្យអស់ពីឃ្លាំង ព្រោះឃ្លានហើយ…ហិហិហិ។បើទោះបីជាយើងខ្វះស្បៀង អស់កំលាំងគ្រប់ៗគ្នា និងមានមិត្តមួយចំនួនបែកកង់ក៏ដោយ (ដោយសារតែបានធ្វើដំណើរប្រមាណ៥០ គីឡូម៉ែត្រឡើងចុះច្រលងភ្នំ) ប៉ុន្តែក្រុមយើងបានធ្វើដំណើរចុះពីភ្នំខ្នងក្រពើនិងមកដល់គេហដ្ឋានរៀងៗខ្លួនដោយសុវត្ថិភាព និងនាំមកនូវអនុស្សាវរីយ៍ល្អជាមួយគ្នាដែលមិនងាយនឹងបំភ្លេចបាន។ ការសហការ ការជួយគ្នាដោយក្តីស្រឡាញ់ និងការមើលថែគ្នាទៅវិញទៅមក គឺជាតម្លៃស្នូលរបស់ក្រុមយើងដូចពាក្យចាស់ថា “នៅផ្ទះម្តាយទីទៃ នៅព្រៃម្តាយតែមួយ។សូមអរគុណដល់មិត្តអ្នកដើរព្រៃទាំងអស់គ្នាសម្រាប់ការចូលរួម។
សូមអរគុណដល់បង Cardamom Mountain ដែលបានជួយណែនាំនៅក្នុងដំណើរដ៏អស្ចារ្យមួយនេះ។ សូមអរគុណដល់បងរ៉ាន់ នៅភូមិសូរិយាសម្រាប់ការនាំផ្លូវ និងសមាជិកសហគមន៍ផ្សេងទៀតដែលជួយមើលថែពួកយើងទាំងអស់គ្នា។
